အခုလို Stay at home ဖြစ်နေတဲ့အချိန်မှာ အပျင်းပြေကြည့်ရှုဖို့ Anime movies လေးတွေကို စုစည်းပေးလိုက်ပါတယ်။ကဲ ..ရှာဖွေကြည့်ရှုပြီး အပျင်းပြေကြပါစေလို့။
1.Stand by Me Doraemon
တကယ်တော့မင်းက ထိုင်းတယ်၊ နှေးတယ်၊ စာလုပ်ရမှာကိုပျင်းတယ်၊ မင်းကကြောက်တတ်တယ်၊ အပျင်းထူတယ်၊ အားကစားလည်းသုံးစားမရဘူး၊ သူရဲဘောကြောင်တယ်၊ အမေ့မေ့အလျော့လျော့နဲ့၊ စိတ်ချယုံကြည်လို့မရတဲ့ ထူထူထိုင်းထိုင်း၊ မင်းက လူပျော့လူညံ့၊ သဘောပေါက်လည်းနှေးတယ်၊ ဒီကြားထဲ ကံကလည်းခဏခဏဆိုးသေး၊ လူဆိုးလေး…ဆိုပြီး
ကြောင်စက်ရုပ်လေးဒိုရေမွန်ဟာ မျက်ရည်တွေကျနေတယ်။ အနာဂတ်ကစက်ရုပ်တွေဟာ ငိုတတ်သလားတော့ ကျနော်မသိပါဘူး။ ဒါပေမယ့် ရုပ်ရှင်ကိုကြည့်နေရတဲ့လူကတော့ ရင်ထဲဆို့ပြီး မျက်ရည်ဝဲတတ်လာတာဘဲ…။ အလွဲလွဲအချော်ချော်ဖြစ်တိုင်း၊ အနိုင်ကျင့်ခံရတိုင်း၊ ဒုက္ခရောက်တိုင်း အသံပြဲနဲ့ငိုပြီး ဒိုရေမွန်လို့ လှမ်းအကူညီတောင်းတတ်တဲ့ နိုဘိတကိုချစ်တယ်။ နိုဘိတ ပူဆာသမျှကို ဖြည့်ဆည်းပေးပြီး တလွဲတွေလုပ်တိုင်း နောက်ကနေလိုက်ရှင်းပေးပြီး နိုဘိတအတွက် စိတ်တွေညစ်နေတဲ့ ဒိုရေမွန်ဆိုတဲ့ ကြောင်စက်ရုပ်လေးကိုချစ်တယ်။ တကယ်ချစ်ဖို့ကောင်းတဲ့ ဇာတ်ကားလေးမို့ ကြည့်ကြည့်ကြပါဦး။ အော်..မေ့လို့ နိုဘိတ တစ်ဘက်သတ်ကြိုက်နေတဲ့ ရှီဇူကာဆိုတဲ့ ကောင်မလေးရဲ့ စိတ်ထားလေးကလည်း ချစ်ဖို့ကောင်းချက်…။
2.Your Name
အင်နီမေးရှင်းဇာတ်ကားတွေထဲမှာ ပြောစမတ်တွင်ခဲ့တဲ့ ဇာတ်ကားကောင်းလေးတစ်ကားဘဲဖြစ်ပါတယ်။ အနုစိတ်တဲ့ဖန်တီးရေးဆွဲမှုတွေ၊ လျှို့ဝှက်ဆန်းကြယ်မှုတွေအပြည့်နဲ့ ဇာတ်လမ်းသွား၊ ထင်မှတ်မထားတဲ့အချိုးအကွေ့တွေနဲ့မို့ ကြည့်ပြီးရင် “တသသ” ဖြစ်ကျန်နေမှာပါ။ ဇာတ်ကားအစပိုင်းမှာတော့ နည်းနည်းလေးနားမလည်နိုင်သလို ဖြစ်နေနိုင်ပေမယ့် နည်းနည်းကြာရင်တော့ ဘယ်လိုဆက်ဖြစ်မလဲဆိုတာကို စိတ်ဝင်တစားနဲ့ ဆက်လက်ကြည့်ဖြစ်သွားကြမှာပါ။ မကြည့်ရသေးရင် ကြည့်ကြည့်ကြပါဦး။ တကယ်ကောင်းတဲ့ ဇာတ်ကားဖြစ်တယ်ဆိုတာ အာမခံပါတယ်။
3.Shaun the Sheep movie
လယ်တောတစ်ခုထဲမှာ ခြံပိုင်ရှင်အဘိုးကြီးတစ်ယောက်ရယ်၊ အစောင့်ခွေးလေးတစ်ကောင်ရယ်၊ သိုးတစ်အုပ်ရယ်နဲ့ တိုင်ပတ်နေကြတာ …။ စကားပြောတာတွေဘာတွေမပါဘဲနဲ့ ကြည့်ပြီးတော့ ရယ်နေရတဲ့ ဇာတ်ကားကောင်းလေးတစ်ကားဘဲဖြစ်ပါတယ်။ အိမ်တွင်းအောင်းနေရတဲ့ စိတ်ငြီးငွေ့မှုတွေကို ဖြေဖျောက်ပေးနိုင်မှာပါ။ ကြည့်ကြည့်ပါဦး။
4.Captain Underpants
တကယ့်အခွီကားလေးတစ်ကားပါ။ မူလတန်းကျောင်းက ပေါက်ကရလုပ်တတ်တဲ့ ကလေးနှစ်ယောက်နဲ့ စိတ်တိုဒေါသထွက်တတ်တဲ့ ကျောင်းအုပ်ကြီးရယ်ကြား စိတ်ညို့လို့ရတဲ့ လက်စွပ်တစ်ကွင်းရောက်လာတော့ တကယ်ရယ်ရတဲ့ စူပါဟီးရိုး ကက်ပတိန်အန်ဒါပန့်ခ် တစ်ယောက်ပေါ်ထွက်လာပါတယ်။ ကျောင်းအုပ်ကြီးကို စိတ်ညို့ပြီး လုပ်ချင်တာလုပ်ခိုင်း၊ ကျောင်းအုပ်ကြီးကလည်း စိတ်ညို့ခံရတဲ့ အချိန်မှာ စူပါပါဝါတွေရှိနေပြီး စိတ်ညို့ခံရတာပျယ်သွားတဲ့အချိန်မှာတော့ ဘာဖြစ်လို့ဖြစ်မှန်းမသိဆိုတော့ ကလေးနှစ်ယောက်က စိတ်ကြိုက်ပေါ့။ တစ်နေ့မှာတော့ ရယ်မောတာတွေကိုမုန်းတဲ့ ပရော်ဖက်ဆာတစ်ယောက်က ကျောင်းဆရာအဖြစ်ရောက်လာပါတယ်။ အဲ့ဒီမှာ ဘယ်လိုအလွဲတွေ၊ ရယ်မောစရာတွေ၊ စွန့်စားခန်းတွေကို တွေ့ရမလဲဆိုတာတော့ ကြည့်ကြည့်ကြပါဦး။ တကယ့်ကိုပါးစပ်မစိဘဲ ရယ်ရတဲ့ ဇာတ်ကားလေးတစ်ကားပါ။
5.Emoji Movie
ကျနော်တို့ အသုံးပြုတတ်ကြတဲ့ Emoji ရုပ်လေးတွေကို ဇာတ်ကောင်ထားပြီး ဖန်တီးထားတာမို့ ပျင်းဖို့ကောင်းမယ့် ဇာတ်ကားလို့ အစကထင်ခဲ့မိတာ၊ ကြည့်မိတော့မှ ထင်ထားသလိုပျင်းဖို့မကောင်းဘဲ ရသစုံ ပေးစွမ်းသွားတဲ့ ဇာတ်ကားလေးတစ်ကားဖြစ်နေပါတယ်။ တအားကြီးကောင်းတယ်လို့ မညွှန်းချင်ပေမယ့် မလျော့တဲ့ ဇာတ်ကားတစ်ကားလို့တော့ ပြောလို့ရပါတယ်။
6.The Peanuts Movie
ဘာလုပ်လုပ်မအောင်မြင်တဲ့ အရှုံးသမားလေး ချာလီဘရောင်းနဲ့ သူရဲ့ အချစ်တော်ခွေးကလေးရဲ့ တလွဲတွေကို ခံစားရယ်မောကြည့်ကြပါဦး။ နှစ်သက်မိတဲ့ ဇာတ်ကားလေးတစ်ကားဘဲ ဖြစ်ပါတယ်။
7.Monsters University
အများကြီးမညွှန်းချင်တော့ပါဘူး။ ဒီကားလေးကိုတော့ တော်တော်များများတော့ကြည့်ဖူးကြမယ်ထင်ပါတယ်။ မကြည့်ဖူးသေးရင်တော့ ကြည့်ကြည့်ပါလို့ တိုက်တွန်းပါရစေ။ တကယ်ကောင်းတဲ့ ဇာတ်ကားလေးပါ။ နာမည်ကျော်အခြောက်အလှန့်သမားဖြစ်ချင်ပေမယ့် ပုံပန်းသဏ္ဍာန်ကြောင့် လှောင်ပြောင်ခံရတဲ့ မိုက်ခ်ဝါဇိုစကီးရယ်၊ နာမည်ကြီး မိသားစုကပေါက်ဖွားလာတဲ့ ဆူလီဗန်ရယ်၊ မွန်းစတားတက္ကသိုလ်က အနှိမ်ခံမွန်းစတားလေးတွေရယ် အတူတူပူပေါင်းပြီး အခြောက်အလှန့်သမားပြိုင်ပွဲမှာ ဗိုလ်စွဲနိုင်ဖို့ ကြိုးစားကြပြီး အနှိမ်ခံ၊ အလှောင်ပြောင်ခံဘဝကနေ လွတ်မြောက်ကြဖို့ ကြိုးစားတဲ့အကြောင်းကို အခြေခံပြီး ရသစုံပေးစွမ်းသွားတဲ့ ဇာတ်ကားကောင်းလေးဘဲဖြစ်ပါတယ်။
8.Monsters, Inc
ဒီကားလေးကတော့ ပထမကားထက် ပိုကြိုက်မိတဲ့ ကားလေးပါဘဲ။ မိုက်ခ်ဝါဇိုစကီးနဲ့ ဆူလီဗန်တို့ရဲ့ မွန်းစတားကမ္ဘာထဲကို လူသားကလေးမလေး Boo မတော်တဆရောက်လာပြီး ကလေးမလေး Boo ကို သံယောဇဉ်တွယ်သွားတဲ့အခါမှာတော့ Boo ကို ဒုက္ခပေးမယ့်မွန်းစတားတွေရဲ့ ရန်ကနေကာကွယ်ပေးဖို့ကြိုးစားကြပါတယ်။ ဒါပေမယ့် ကျောင်းတော်ကရန်စရှိတဲ့ မွန်းစတားတစ်ကောင်က Boo ကိုပစ်မှတ်ထားပြီး မိုက်ခ်နဲ့ ဆူလီဗန်တို့ကို ရည်ရွယ်ချက်ရှိရှိအကောက်ကြံတဲ့အခါမှာတော့ Boo ကို လူသားကမ္ဘာကို ပြန်ပို့ဖို့ ကြံစည်ထားတာတွေလက်တွေ့မှာဖြစ်နိုင်ပါ့မလားဆိုတာ ကြည့်ကြည့်ကြပါဦး။ ကြည့်ပြီးရင်တော့ စိတ်ထဲစွဲကျန်နေရစ်မယ်ဆိုတာ ယုံကြည်ပါတယ်။
9.A Monster In Paris
မတော်တဆဖြစ်ပွားမှုတစ်ခုကနေ ပဲရစ်မြို့ကြီးထဲမှာ မွန်းစတားတစ်ကောင်ပေါ်ထွက်လာပါတယ်။ ဒါပေမယ့် လူအများအထိတ်လန့်ဖြစ်ကြတဲ့ အဲ့ဒီမွန်းစတားဟာ တကယ်တော့ လူတွေကို ဒုက္ခမပေးဘဲ သူ့ဘာသာအေးအေးဆေးဆေးနေပေမယ့် သူရဲကောင်းဖြစ်ချင်နေတဲ့လူတစ်စုကြောင့် သူဟာ အသက်လုပြေးလွှားရင်း အဆိုတော်ကောင်မလေးတစ်ယောက်ဆီ ရောက်ရှိသွားပါတယ်။ အဆိုတော်ကောင်မလေးနဲ့ သူနဲ့ နားလည်မှုရှိရှိ အေးချမ်းပျော်ရွှင်စွာ နေရပြီလို့ ထင်မှတ်ထားပေမယ့် သူ့ကို အလွတ်မပေးတဲ့ သူရဲဘောကြောင်တဲ့ အတုအယောင်သူရဲကောင်းတွေကြောင့် သူဟာနောက်ထပ်တစ်ကြိမ်အသက်လုပြေးရပြန်ပါတယ်။ ထပ်ပြောပြရင် ဇာတ်လမ်းပေါ့သွားမှာစိုးလို့ ကိုယ့်ဘာသာဘဲ ကြည့်ကြပါတော့နော်။
10.Kubo and the Two Strings
မွေးရာပါ မှော်အတတ်ပညာရှိပေမယ့် စားဝတ်နေရေးအတွက် အရုပ်တိုက်ပွဲပြုလုပ်ပြီး ပုံဖော်ပြတာကလွဲလို့ အခြားမှာအသုံးချခွင့်မရှိခဲ့ပါဘူး။ သူရဲ့အဘိုး အရိပ်မိစ္ဆာကြီးက သူနဲ့ သူ့အမေကို လိုက်ဖမ်းနေတာမို့ နေဝင်ပြီဆို အပြင်မထွက်ရဲဘဲ ပုန်းနေခဲ့ရပါတယ်။ ဒါပေမယ့် တစ်နေ့တော့ သူ့အမေစကားကို လွန်ဆန်ပြီး ညဘက်အပြင်ထွက်မိတဲ့အခါ သူနဲ့ သူ့အမေရှိတဲ့နေရာကို သူ့အဘိုး မိစ္ဆာကြီးသိသွားပြီး လိုက်လံဖမ်းစီးရာမှာ သူ့အမေကိုဖမ်းမိသွားပေမယ့် သူကတော့လွတ်မြောက်သွားပါတယ်။ ဒီတော့ ဆက်ကြည့်ကြည့်ပါဦး။ တော်တော်ကောင်းတဲ့ ဇာတ်ကားလေးဘဲဖြစ်ပါတယ်။
#Lifestyle_myanmar
#Dmo_aung
