လူတိုင်းလူတိုင်းမှာ သူငယ်ချင်းမိတ်ဆွေ ဘော်ဒါဘော်ကျွတ်တွေဆိုတာ ရှိကြပေမယ့် အတွဲညီတဲ့ ဘော်ဒါကောင်း သူငယ်ချင်းကောင်းကတော့ ရှားပါတယ်။ အကယ်၍ သင့်မှာသာ အခုပြောပြမယ့်အချက်တွေနဲ့ ကိုက်ညီတဲ့ သူငယ်ချင်းကောင်းတစ်ယောက် ပိုင်ဆိုင်ထားပြီဆိုရင်တော့ အဲ့ဒီသူငယ်ချင်းနဲ့ခင်မင်မှုကို တန်ဖိုးထားလိုက်ပါတော့နော်။
(၁) ဝေမျှခံစားနိုင်တယ်
တစ်ချို့လူတွေက သူငယ်ချင်းလို့သာ ပြောနေကြပေမယ့် သာပေါင်းညာစား အကျော်အခွဇယားတွေနဲ့ ကိုယ်အတွက် အမြတ်မကျန်ရင် မပေါင်းသင်းတော့ပါဘူး။ ကိုယ့်မှာရေလျှံနေချိန် အရမ်းချစ်တဲ့သူငယ်ချင်းတစ်ယောက်ဖြစ်ခဲ့ပေမယ့် ပြတ်လပ်နေပြီဆိုရင် အမြှီးတောင်ဖမ်းလို့ မမိတော့တဲ့သူမျိုးတွေအများကြီးပါ။ ဒီလိုလူတွေက ဘယ်လိုနည်းနဲ့မှ ဘော်ဒါကောင်းမဖြစ်နိုင်ပါဘူး။ မရှိအတူရှိအတူ ပျော်လဲအတူတူ ဝမ်းနည်းလဲအတူတူ အရာအားလုံးဝေမျှခံစားနိုင်မှ သူငယ်ချင်းကောင်းတို့ရဲ့ အရည်အချင်းနဲ့ ကိုက်ညီတာဖြစ်ပါတယ်။
(၂) စိတ်တူကိုယ်တူရှိတယ်
ဘုရားပဲသွားမလား ကလပ်ပဲတက်မလား ကောင်းတာလုပ်မလား မကောင်းတာပဲလုပ်မလား ဘာမှသိပ်ညှိနှိုင်းနေစရာမလိုတဲ့ သူငယ်ချင်းမျိုးကြုံဖူးပါသလား။ လူတစ်ယောက်နဲ့ တစ်ယောက် အကြိုက်ချင်းမတူ စိတ်ချင်းတူနိုင်ဖို့ဆိုတာ ခက်ခဲပေမယ့်လည်း မတူညီတဲ့လူတွေများစွာထဲကမှ စိတ်တူကိုယ်တူ ဝါသနာတူနေပြီဆိုရင်တော့ အဲ့လိုလူကသင့်အတွက် အကောင်းဆုံး သူငယ်ချင်းတစ်ယောက်လို့ သတ်မှတ်လို့ရပါပြီ။
(၃) တစ်ယောက်အတွက်တစ်ယောက်အသင့်ရှိတယ်
တစ်ယောက်အတွက်တစ်ယောက် အမြဲအသင့်ရှိနေပေးတဲ့ သူငယ်ချင်းမျိုးဆိုတာရှားပါတယ်။ ဘော်ဒါကောင်းသူငယ်ချင်းကောင်းဆိုတာကတော့ စိတ်ညစ်နေလို့ ဖုန်းဆက်ခေါ်ရင် ချက်ချင်းရောက်လာတာမျိုး ရန်ဖြစ်လို့အကူညီတောင်းရင် ကိုယ့်ထက်အရင် ဆော်ထည့်လိုက်တာမျိုး စသည်ဖြင့် တစ်ယောက်ကိုတစ်ယောက် ကူညီဖို့အမြဲအသင့်ရှိနေမှာဖြစ်ပါတယ်။
(၄) ယုံကြည်ရတယ်
သူငယ်ချင်းအရင်းအချာတွေဆိုတာ သွေးသားအရင်းတွေလို ယုံကြည်ရတဲ့သူတွေဖြစ်ဖို့လိုပါတယ်။ တစ်ယောက်နဲ့တစ်ယောက်မှာ လျို့ဝှက်ချက်တွေသိပ်မထားဘူး။ အရာအားလုံးပွင့်ပွင့်လင်းလင်းရှိတယ်။ အလုပ်အကြောင်း မိသားစုအကြောင်း ချစ်သူအကြောင်း နောက်ဆုံးငွေရေးကြေးရေးကအစ စိတ်ချယုံကြည်ရတယ်။ ကိုယ့်အပေါ်ဘယ်တော့မှ သစ္စာဖောက်သွားမယ့်လူမျိုးမဟုတ်ဘူး။ တစ်ယောက်နဲ့တစ်ယောက် စောင့်ထိန်းသင့်တဲ့ စည်းတွေကိုလည်း စောင့်ထိန်းတယ်ဆိုရင်တော့ အဲ့ဒီလူဟာ သင့်အတွက် ဘော်ဒါကောင်းကြီးပါပဲ။
Lifestyle_Myanmar
ref-happify
