ကိုရိုနာဗိုင်းရပ်စ်နဲ့ပတ်သက်ပြီး မဟုတ်မမှန်သတင်းအချက်အလက်တွေပါဝင်တဲ့ ဗီဒီယိုတွေကို Facebook၊ Twitter နဲ့ YouTube တို့မှာ မျှဝေခဲ့တဲ့ အမေရိကန်သမ္မတဒေါ်နယ်ထရမ့်ရဲ့ ပို့စ်တွေ ဖျက်ချခံခဲ့ရတယ်လို့ သိရှိရပါတယ်။ ဒီဗီဒီယိုတွေကို ဒေါ်နယ်ထရမ့်တင်မဟုတ်ဘဲ သူ့ရဲ့သားဖြစ်သူ ဒေါ်နယ်ထရမ့်ဂျူနီယာကပါ အတူတူရှဲခဲ့တာဖြစ်ပြီး ဒီပို့စ်တွေအားလုံးကို နာမည်ကြီး ဆိုရှယ်မီဒီယာတွေက ပြတ်ပြတ်သားသားဖျက်ချခဲ့တာပါ။
ဒေါ်နယ်ထရမ့်တို့သားအဖရှဲခဲ့တဲ့ ဗီဒီယိုထဲမှာ နှာခေါင်းစည်းတပ်ဆင်တာ၊ Lockdown စည်းကမ်းချမှတ်တာတွေက ကိုရိုနာဗိုင်းရပ်စ်ကူးစက်မှုကို မရပ်တန့်နိုင်ဘူးလို့ဆိုထားပြီး ဒါဟာ ကမ္ဘာပေါ်မှာ လတ်တလောရင်ဆိုင်နေရတဲ့ ကိုရိုနာဗိုင်းရပ်စ်နဲ့ပတ်သက်လို့ လုံးဝကိုမှားယွင်းနေတဲ့ အချက်အလက်တွေဖြစ်နေပါတယ်။ ဒါ့အပြင် အဲ့ဒီဗီဒီယိုထဲမှာပါဝင်တဲ့ဆရာဝန်တွေက ဒေါ်နယ်ထရမ့်အကြီးအကျယ်ထောက်ခံခဲ့တဲ့ Hydroxychloroquine ကိုသုံးစွဲတဲ့အပေါ်မှာလည်း ကာကွယ်ပြောကြားထားပါသေးတယ်။ ဒီလိုမျိုး Hydroxychloroquine ကို သုံးစွဲတာက ကိုရိုနာဗိုင်းရပ်စ်ကူးစက်ခံထားရတဲ့လူနာတွေအတွက် ဘာအကျိုးမှမရှိဘဲ သေဆုံးမှုနှုန်း ဒါမှမဟုတ် ရောဂါကပြန်လည်သက်သာလာနှုန်းကို လျော့ကျစေခြင်းမရှိဘူးလို့ ပြီးခဲ့တဲ့လအတွင်းမှာတင် FDA က တရားဝင်ကြေညာထားတာပါ။
ကိုရိုနာဗိုင်းရပ်စ်ကုသတဲ့နေရာမှာအကျိုးမရှိတဲ့ ဒီဆေးဝါးတွေက နှလုံးခုန်နှုန်း၊ ကျောက်ကပ်နဲ့အသည်းတို့ကိုပါ ပြဿနာဖြစ်စေနိုင်တယ်လို့ FDA က ကြေညာထားတာလည်းဖြစ်ပါတယ်။ ဒီဗီဒီယိုကို ပြီးခဲ့တဲ့ဇူလိုင်လ (၁၅) ရက်နေ့မှာ အမေရိကန်နိုင်ငံရဲ့ ရှေ့တန်းကနေ ကိုရိုနာဗိုင်းရပ်စ်ကိုတိုက်ဖျက်နေတဲ့ ဆရာဝန်တွေရဲ့ ဗီဒီယိုဖြစ်ပေမယ့် ဗီဒီယိုထဲမှာပါဝင်တဲ့သူအကုန်လုံးက ဆရာဝန်တွေမဟုတ်ဘူးလို့ NBC သတင်းဌာနရဲ့ ဂျာနယ်လစ် ဇာဒရိုနီက ဆိုပါတယ်။ CNN Business ရဲ့ ဖော်ပြချက်အရ ဒီဗီဒီယိုကို မဖျက်ချခင်အထိ Facebook မှာကြည့်ရှုတဲ့သူပေါင်း (၁၄) သန်းကျော်ရှိခဲ့သလို မျှဝေသူပေါင်း (၆) သိန်းနီးပါးအထိ ရှိခဲ့တယ်လို့လည်း သိရှိရပါတယ်။
ဒီလိုမျိုး ဒေါ်နယ်ထရမ့်တို့သားအဖ ရှဲထားတဲ့ ဗီဒီယိုကို ဖျက်ချခဲ့တဲ့အပေါ် မှာလည်း Facebook နဲ့ Twitter တို့ရဲ့ ပြောရေးဆိုခွင့်ရှိသူတွေက ဖြေရှင်းချက်ပေးခဲ့ပြီးပြီဖြစ်ပါတယ်။ ဒေါ်နယ်ထရမ့်ဟာ အရင်တည်းက ကိုရိုနာဗိုင်းရပ်စ်နဲ့ပတ်သက်ပြီး သမ္မတတစ်ယောက်အနေနဲ့ မပြောသင့်တဲ့စကားတွေကို မကြာခဏပြောဆိုခဲ့သူဖြစ်ပြီး ဆိုရှယ်မီဒီယာပေါ်မှာလည်း အငြင်းပွားဖွယ်ရာဖြစ်ရပ်တွေကို အမြဲတမ်းဖန်တီးနေတဲ့ပုဂ္ဂိုလ်တစ်ဦးဖြစ်ပါတယ်။ လူမည်းအမျိုးသားဂျော့ခ်ျဖလွိုက်သေဆုံးခဲ့တဲ့ကိစ္စနဲ့ပတ်သက်လို့လည်း Facebook ပေါ်မှာ ဒေါ်နယ်ထရမ့်ရေးသားခဲ့တဲ့အငြင်းပွားဖွယ် Status ကို ဖျက်ချခဲ့ခြင်းမရှိတာကြောင့် လူအများက Facebook ကို ဝေဖန်ခဲ့ကြပါသေးတာပါ။ အဲ့ဒါကြောင့်လည်း ဒီတစ်ကြိမ်မှာတော့ Facebook အနေနဲ့ လုံးဝအမှားအယွင်းမခံတော့ဘဲ ဒေါ်နယ်ထရမ့်ရှဲထားတဲ့ မဟုတ်မမှန်သတင်းအချက်အလက်တွေနဲ့ပို့စ်ကို ပြတ်ပြတ်သားသားဖျက်ချခဲ့တာလည်းဖြစ်နိုင်ပါတယ်။
#HM
#LifestyleMyanmar
Source: Unilad
