European Society of Cardiology ကဲ့သို့သော အဖွဲ့အစည်းတွေက အိပ်ရခက်ခဲတဲ့ လူနာတွေကို တစ်နေ့လျှင် တစ်နာရီ ယောဂလေ့ကျင့်ဖို့ အကြံပြုထားပါတယ်။ ယောဂနေ့စဉ်လေ့ကျင့်ခြင်းက သွေးတိုးရောဂါကို ကာကွယ်နိုင်တယ်လို့ သုတေသီတွေက ဆိုပါတယ်။ ဒါ့အပြင် ယောဂဟာ စိတ်ဖိစီးမှုကို လျှော့ချပေးနိုင်ကြောင်း ပြသထားပါတယ်။ အိပ်မပျော်ခြင်းကို တိုက်ဖျက်ဖို့အတွက် အကောင်းဆုံး ယောဂလေ့ကျင့်ခန်းအချို့ကို မျှဝေပေးလိုက်ရပါတယ်။

ယောဂကျင့်စဉ် (၄)ခုက ညဘက်မှာ ကောင်းမွန်စွာ အိပ်ပျော်စေပါတယ်

ယောဂက သင့်ရဲ့အိပ်စက်ခြင်းပြဿနာတွေကို ချက်ချင်းဖြေရှင်းနိုင်မှာ မဟုတ်ပါဘူး။ ဒါပေမယ့် အိပ်ရာမဝင်ခင် နေ့တိုင်းလေ့ကျင့်ပေးမယ်ဆိုရင် ဒါက သင့်အိပ်စက်မှု အရည်အသွေးကို မြှင့်တင်ပေးနိုင်တာကို သတိပြုမိပါလိမ့်မယ်။ relax ပိုဖြစ်လာမှာဖြစ်ပြီး ဘဝရဲ့ စိတ်ဖိစီးမှုအဆင့်ကို လျှော့ချပေးပါလိမ့်မယ်။ ဒါက သင့်ရဲ့စိတ်ကို ကြည်လင်စေပြီး အိပ်ရာဝင်ချိန်မှာ ကောင်းကောင်း အနားရစေပါလိမ့်မယ်။

၁။ Hero or Virasana

သူ့ရဲ့အမည်က လုံးဝဆန့်ကျင်ဘက်လို့ ထင်ရပေမယ့် သင့်အား အနားရဖို့ ကူညီပေးမယ့် အကောင်းဆုံး ကျင့်စဉ်တွေထဲမှ တစ်ခုဖြစ်ပါတယ်။ အိပ်ရာမဝင်ခင် Hero pose မှာ မိနစ်အနည်းငယ်လောက် အချိန်ယူဖို့ အကြံပြုထားပါတယ်။ ပထမဆုံးလုပ်ရမှာက ကြမ်းပြင်ပေါ်မှာ ဂျပန်စတိုင်ထိုင်ပါ။ W ပုံစံထိုင်သလို ဒူးကွေးပြီး သင့်ခြေထောက်တွေကို နောက်ပစ်ထားပါ။ ကျောရိုးကို ဖြောင့်ဖြောင့်တန်းတန်းထားပါ။ ဒူးပေါ်မှာ ဖိအားအရမ်းများရင် ခြေဖဝါးကြားမှာ ခေါင်းအုံးတစ်ခုထားပြီး တင်ပါးအောက်မှာ ခုထားပါ။

hero pose က ရုပ်ပိုင်းဆိုင်ရာ ကျန်းမာစေပြီး စိတ်ပိုင်းဆိုင်ရာ တည်ငြိမ်စေဖို့ ကူညီပေးပါတယ်။ ဘာကြောင့်လဲဆိုတော့ ဒီအနေအထားတွင် ထိုင်ခြင်းက ခန္ဓာကိုယ်တစ်ခုလုံးကို ပြေလျော့စေမယ့် ခြေထောက်တွေရဲ့ မျက်နှာပြင်ပေါ်ရှိ ဖိအားတွေကို လှုံ့ဆော်ပေးတာကြောင့်ပါ။

၂။ Corpse or Savasana

ဒီဒုတိယကျင့်စဉ်က သင့်စိတ်ကို ဗဟိုပြုဖို့ ကူညီရာမှာ အသုံးဝင်ပါတယ်။ ဒါကို ပြုလုပ်ခြင်းဖြင့် သင်ဟာ သင့်ရဲ့အသက်ရှုခြင်းနဲ့ ” ပြန်ချိတ်ဆက်နိုင်ပြီး သင့်ခန္ဓာကိုယ်နဲ့ လိုက်လျောညီထွေဖြစ်အောင် သင့်နေ့စဉ် စိတ်ဖိစီးမှုတွေကို လွတ်မြောက်စေနိုင်ပါတယ်။ သင့်အား ညဘက်မှာ ကောင်းမွန်စွာ အိပ်ပျော်စေဖို့ ကူညီပေးလိမ့်မှာ ဖြစ်တာကြောင့် ယခင်လေ့ကျင့်ခန်းအတိုင်း မအိပ်ခင်မှာပဲ corpse pose ကို ပြုလုပ်ဖို့ အကြံပြုအပ်ပါတယ်။

ပထမဆုံးအနေနဲ့ ခြေထောက်တွေကို နည်းနည်းချဲပြီး ပက်လက်အိပ်ပါ ။ လက်တွေကို သင့်ဘေးနှစ်ဖက်မှာ ဖြေလျှော့ထားပါ။ ပြီးရင် လက်ဖဝါးတွေကို မြှောက်ပြီး မျက်လုံးတွေကို မှိတ်ထားပါ။ ဒီလိုလုပ်ရင်းနဲ့ အသက်အနည်းငယ်ရှုပြီး ဖြည်းဖြည်းချင်း ရှုသွင်း၊ ရှုထုတ်လုပ်ပါ။ ဒါကို စက္ကန့်အတော်ကြာအောင် ပြုလုပ်ပြီး သင်ဘယ်လောက် relax ဖြစ်ကြောင်း သတိပြုမိပါလိမ့်မယ်။

၃။ Spinal twist or Jathara Parivartanasana

ညဘက်မှာ ဝမ်းဗိုက်ပြဿနာရှိနေရင် ကျောရိုးလှည့်ကျင့်စဉ်ကို လေ့ကျင့်ဖို့ အကြံပြုပါတယ်။ ဒီလေ့ကျင့်ခန်းက အစာအိမ်ရောင်ရမ်းတာကို သက်သာစေပြီး gases တွေကို ထိန်းထားနိုင်ပါတယ်။ ဒါ့အပြင် သွေးလှည့်ပတ်မှုကို ကောင်းမွန်စေပြီး လည်ပင်းနဲ့ နောက်ကျောနေရာတွေမှာ တင်းမာမှုတွေကို သက်သာစေပါတယ်။

ပထမဆုံးအနေနဲ့ ကြမ်းပြင်ပေါ်မှာ ပက်လက်လှဲနေရပါမယ်။ လက်နှစ်ဖက်ကို ဆန့်တန်းပြီး ဒူးကိုကွေးပါ၊ ရင်ဘတ်နဲ့ နီးကပ်အောင်ထားပါ။ သင့်ဘယ်ဘက်ပခုံးကို မြေပြင်နဲ့ထိပြီး သင့်ခန္ဓာကိုယ်ကို ညာဘက်သို့ ရွှေ့ပါ။ ပြီးနောက် သင့်ခေါင်းကို ဘယ်ဘက်သို့ လှည့်ပါ။ ပိုထိရောက်စွာ ဆန့်ထုတ်နိုင်ဖို့ ညာဘက်လက်နဲ့ ဒူးတွေကို ဖိထားပါ။

ဒီအနေအထားကို ထိန်းထားပြီး ၆အထိ ရေတွက်ပါ။ သင်ရေတွက်တဲ့အတိုင်း ဖြည်းချင်းစွာ ရှုသွင်း၊ ရှုထုတ်ပါ။ ပြီးနောက် လေ့ကျင့်ခန်းအပြည့်အစုံကို ပြီးမြောက်ဖို့ သင့်ခန္ဓာကိုယ်ရဲ့ ဘယ်ဘက်ခြမ်းအတွက် အစဉ်လိုက်အတိုင်း ပြန်လုပ်ပါ။

၄။ Legs-up-the-wall or Viparita Karani

တစ်နေ့တာ အလုပ်လုပ်ပြီးနောက် အထူးသဖြင့် တစ်နေ့လုံး မတ်တပ်ရပ်ရရင် ခြေဖဝါးနဲ့ ခြေချင်းဝတ်တွေ ဖောင်းလာပြီး မောပန်းနွမ်းနယ်လာနိုင်ပါတယ်။ ဒီလေ့ကျင့်ခန်းက သင့်သွေးစီးဆင်းမှုကို ထိန်းညှိပေးတဲ့အတွက် အရမ်းအသုံးဝင်ပါတယ်။

ပထမဆုံး နေရာကျယ်ကျယ်ရှိတဲ့ နံရံနားက ကြမ်းပြင်ပေါ်မှာ ယောဂဖျာကို ချထားပါ။ ဖျာပေါ်မှာ ကျောခင်းပြီး ခြေထောက်တွေကို အပေါ်သို့မြှောက်ကာ နံရံကို မှီပါ။ သင့်လက်နှစ်ဖက်ကို ခန္ဓာကိုယ် ဘေးနှစ်ဖက်မှာ ဆန့်ထုတ်ထားပြီး နက်ရှိုင်းစွာ အသက်ရှုပါ။ ဒီလေ့ကျင့်ခန်းကို လိုအပ်သမျှ ကာလပတ်လုံး လေ့ကျင့်နိုင်ပါတယ်။

နိဂုံးချုပ်အနေနဲ့ ယောဂဟာ ခန္ဓာကိုယ်နဲ့ စိတ်ကို ပြေလျော့စေတာကြောင့် အိပ်မပျော်ခြင်းအတွက် အကောင်းဆုံး ကုထုံးတစ်ခုလို့ ယူဆကြပါတယ်။ ဒီယောဂကျင့်စဉ်ကို ပုံမှန်စလုပ်ရင် သင့်ဘဝရဲ့ တင်းမာမှုနဲ့ စိတ်ဖိစီးမှုတွေကို လျှော့ချပေးတဲ့အတွက် သင့်အနေနဲ့ အိပ်စက်ခြင်းဆိုင်ရာ အကျိုးကျေးဇူးတွေကို သိသိသာသာ ရရှိသင့်ပါတယ်။

Lifestyle_Myanmar

LM_Nandar

Source-exploringyourmind